Sungguah mak datuak nan disambah, tagah dek adat jo pusako, dek barih cupak jo gantang, batinnyo kapado sagalo niniak jo mamak. Karajo nan bapokok, silang nan bapangka. Adopun panitahan nan ditibokan pado mamak, pihak dikami nan datang, salangkah turun dari janjang, dari tanggo rumah kampuang kami, barih tabantang kami turuik, labuah nan gadang kami tampauh masuak ka jorong kampuang nangko. Kok tibo alah baduduakan, lah tarunjak siriah dicarano, tando lah sudah minum jo makan. Pihak didiri marapulai, lah duduak diateh rumah. Dilingkuang niniak jo mamak, dihadapan ibu jo bapak sarato ipa parabisan. Kok tumbuah ditangah rumah, kajadi adat bijo nan baiak, katungkek pamani jalan, kakarih pamaga diri, kok elok ratak tangannyo, panjang bao pangarek, singkek bao kamauleh, senteng bao kapambilai. Kok elok ratak lidahnyo, kusuik bao kamanyalasai, karuah dapek mampajaniah. Tapi samantangpun baitu, pihak diri marapulai, raso manetek niro pinang, antah baraie antah tidak, nan bak alu patah batimpo...
Pitaruah Marapulai Anak ayam pandai baranang Dapek kakinyo dek buayo Duduaklah sutan jo batanang Ambo kamulai jo bicaro Hari tarang bulan barantai Kapa manuju masuak lauik Hati sanang paham salasai Lah patuik bana kami sabuik Pado bapaluah diganggaman Lah patuik bana kami serakkan Hari baik nan lah tibo Kutiko elok nan lah datang Nyato lah tumbuah nan bak kini Ombak tanang angin salasai Hujan taduah kabuikpun tarang Kinilah marawa nan baturiah Kinilah padan nan baukua Tibo di janji ditaguahi Ikara dimuliakan Mangko tibolah si alek dek bapanggia Lah tibo sapanjang adaik Tarapak dilaman rumah gadang Ditingkek janjang ditapiak bandua Kok duduak lah saedaran Tagak lah sahamparan Nan dimukasuik raso kasampai Nan di ama raso kapacah Dilompek bari basitumpu Cancang bari balandasan Saik bari pamegangan Kabanaran dari kami nan datang Tasuruah tasarayo dari mamak sabalah sinan Nak malabuah kan kato jo bicaro Dipabayiakan hutang nan tapabuek Padolah...